 |
| زوجة عاطف بن حسين: أعوان الستاغ قطعوا علينا الكهرباء وقالولي “عاد راجلك ضد الفساد مالا خلصو فلوس البلاد..وادفعو الفاتورة كاملة” |
اكدت مريم بلحاج أحمد ان اعوان الشركة التونسية للكهرباء والغاز “الستاغ”، عمدوا إلى قطع التيار الكهربائي عن مطعمها بمدينة الشابة بكل “شماتة” ودون تمكينها من تقسيط المبلغ الكامل للفاتورة الذي قالت انه كبير خاصة وانها “تسترزق” من هذا المحل ، موضحة ان احدهم قال لها حرفيا “ماهوش راجع الضو حتى لوكان تكلم قيس سعيد”.
وافادت بلحاج احمد في تدوينة نشرتها بصفحتها على موقع “فايس بوك” اول امس السبت، ان الاعوان اجابوها “عاد عاطف ولد الدولة و ضد الفساد مالا خلصو فلوس البلاد ماكم ضد الفساد ادفعو الفاتورة كاملة”، ملاحظة ان الحادثة لها علاقة كبيرة بدعم زوجها الممثل عاطف بن حسين لرئيس الجمهورية قيس سعيّد ولمبادئ مقاومة الفساد.
وكتبت متوجهة بكلامها إلى زوجها ” نقهروك و نمرجوك و نذلوك كان لزم انت و مرتك و نحيولك كل أمل في الحياة و زيد حب سعيد وزيد عارك الفساد و اعمللنا فيها بطل !!! و غادي effectivement وين أنا زادا يحببوني فيه أكثر و ندور لراجلي و نقلو هاني معاك….أمالا بالروح بالدم نفديك يا سعيد و يا علم و يا و طن أييياه “.
وفيما يلي نص التدوينة كاملا:
جاو قصو عليا الضو في المطعم … و العون قالي بالفم و الملا ماهوش راجع حتى لوكان تكلم قيس سعيد هكاكة gratuitement و بكل سمومية و biensur خذا بايتو مني !!!!! فوقي وقتها تفتوفة مشيت قلتلهم خليوني نخلص بالتقسيط المبلغ كبير و محلي نسترزق منو قالولي عاد عاطف ولد الدولة و ضد الفساد مالا خلصو فلوس البلاد ماكم ضد الفساد ادفعو الفاتورة كاملة.. (بالتهكم و الشماتة) … قبل كنت نقصد عباد كيف تتسكر يوسعو عليا و نخدم و نخلص كي التوانسة الكل ندور العجلة في الأزمة توا الناس ولات إجابتهم في الضاهر و الباطن : اي عاد عاطف ما يعيشش ما دامو يعارك في الناس الكل.. نقلهم يعارك في الفساد موش في الناس الكل و يقول في كلمة الحق و الراجل عندو مبادئه ملي صغير و بوه سنين نظال و معاقب من الsystème كاريارو الكل presque و ما يرشفوها لحد و ما يبيعو لا يتساومو … أكهو عاد مالا يتحمل مسؤوليته سي عاطف (بكللل دوانة و شماتة … )، أخطا عاد إلي عندو ولا عندها عندك حاجة و كنتو صحاب و ليوم هوما ضد قيس سعيد alors مع كل statut متاع عاطف يعبر فيه على حبه للرئيس و إيمانه بالقضية تبدا التليفونات تخبط أيااااا صبرنا عليكم ياسر موش باش نستناو تجي فلوسكم أخلق ولا موت (خاطي الحاجة) موك أملك الوحيد قيس سعيد هاو نقهروك و نمرجوك و نذلوك كان لزم انت و مرتك و نحيولك كل أمل في الحياة و زيد حب سعيد وزيد عارك الفساد و اعمللنا فيها بطل !!! و غادي effectivement وين أنا زادا يحببوني فيه أكثر و ندور لراجلي و نقلو هاني معاك طززززز ههههه 
مع سعيد و ضد الفساد جوع تقهر بربص تهان تعاقب تسكر عليك البيبان موت أفنا أقضا … أمالا بالروح بالدم نفديك يا سعيد و يا علم و يا و طن أييياه 
و بحياة عايلتي و عايلة راجلي و الناس الصناديد تو تضربولنا على الطيارة يا مرضى يا فساد يا حساد يا عملاء يا بيوعة يا انتهازيين يا دوانة في بعضكم، تسكر عليكم اللعب ولا جاي نهاركم قريب وليتو تسيبو في سمكم و تنتقمو sans pitié يا أفاعي يا سقط المتاع … ما دامتش لغيركم يا تفه … راجلي سيد و أنا لبة على صغاري و محال يدوم الحال و هانا جايين و راجعين و الجاي خير و قيس سعيد الأمل الوحيد و كان عجبكم و قد ما تعملو قسام الأرزاق هو الخالق سبحانه و ربي يفرجها mais surtout ربي يفرج عليكم مرضكم المستفحل يا لطيييف !!! مريم بنت الحاج
فاصل موسيقى و سنعود :
واتقل، اتقل علينا بالمواجع، احنا اتوجعنا واكتفينا
وعرفنا مين سبب جراحنا، وعرفنا روحنا والتقينا
عمال وفلاحين وطلبه، دقت ساعتنا وابتداينا
نسلك طريق ما لهش راجع، والنصر قرب من عنينا”.
تعليقات
إرسال تعليق